Basegn d’agir
Il chantun insista explicitamain sin las regiuns da provediment da la sanadad sco instrument directiv strategic e promova consequentamain l'ulteriur svilup dal provediment integrà. In basegn d'agir exista tranter auter areguard la refurma dals servetschs da salvament ed en connex cun l'assistenza da parturir. Il Model directiv da sanadad è la basa per la planisaziun dals ospitals. Tenor la planisaziun actuala duai la nova glista dals ospitals pudair vegnir messa en vigur l'onn 2028.
Regiuns dal provediment da sanadad
Cun il maletg directiv 2013 davart l’organisaziun dal provediment da la sanadad en il chantun Grischun èn vegnidas introducidas las dudesch regiuns da provediment da la sanadad sco rom d’urden structural. Quest model è sa cumprovà sco fundament solid per il provediment integrà.
Il chantun mantegna expressivamain las regiuns da provediment da la sanadad sco instrument da regulaziun strategic e promova da maniera consequenta l’ulteriur svilup dal provediment integrà.
Il sectur da salvament
L’elavuraziun da la nova matrix da provediment sco era ils svilups structurals en il sectur dals ospitals dals davos onns han mussà basegn d’agir en il sectur da l’organisaziun da salvament. L’organisaziun existenta è vegnida discutada en il rom da l’elavuraziun dal model directiv. Per in’analisa pli profunda da las structuras actualas e per l’examinaziun da variantas pussaivlas per in ulteriur svilup, vegn installada ina gruppa da lavur en il terz quartal dal 2026. La finamira èsi da garantir ina concepziun cuminaivla, persistenta, coordinada d’in sectur da salvament d’auta qualitad. Ils resultats vegnan integrads en l’ulteriur svilup da la matrix da provediment.
Provediment psichiatric
Il provediment psichiatric en il chantun Grischun è actualmain organisà per gronda part da maniera centrala sur ils Servetschs psichiatrics dal Grischun (PDGR). I dat numerus models da cooperaziun en las regiuns da provediment da la sanadad, per exempel cun ospitals, organisaziuns da spitex, sco era cun instituziuns da lunga durada. La finamira è da concepir il provediment psichiatric en avegnir anc pli decentral e collià, uschia ch’il sustegn necessari po succeder uschè damanaivel sco pussibel a l‘ambient da vita da las pazientas e dals pazients.
In accent tematic è da rinforzar las cumpetenzas tar il provediment da basa. Instituziuns da tgira, organisaziuns da spitex ed autras persunas spezialisadas dal sectur da sanadad èn adina dapli confruntadas cun dumondas cumplexas en il sectur da la psichiatria. Perquai duain las purschidas da scolaziun e da perfecziunament sco era la cussegliaziun professiunala punctuala vegnir amplifitgadas sistematicamain. Plattafurmas da colliaziun e programs da perfecziunament pussibiliteschan in meglier transfer da savida, il barat professiunal e la coordinaziun.
Sfidas specificas existan tar l’interfatscha tranter la tgira a lunga durada e la psichiatria da persunas attempadas. La midada dal domicil po chaschunar ina clera destabilisaziun gist tar persunas pli attempadas. Perquai èsi ina finamira da consolidar l’assistenza psichiatrica pli ferm en structuras da tgira e d’assistenza existentas e dad evitar ospitalisaziuns nunnecessarias. Purschidas consiliaras e da sustegn per instituziuns da tgira pon contribuir da stabilisar pazientas e pazients tant sco pussaivel en lur conturn usità.
Era en la psichiatria d’uffants e giuvenils existan vinavant ina gronda dumonda e per part lungs temps da spetga. Cun la nova psichiatria staziunara d’uffants e giuvenils a Cuira, cun las purschidas nunbirocraticas e simplas da walk-in, e cun ils process optimads da management da cas vegnan cas d’urgenza registrads pli spert ed il sistem vegn distgargià en general.
A lunga vista ha l’ulteriur svilup dal provediment psichiatric la finamira da rinforzar la collavuraziun tranter ils PDGR, ils ospitals somatics, medias e medis domiciliads, organisaziuns da spitex ed instituziuns da tgira, dad amplifitgar las cumpetenzas en la surfatscha e dad orientar il provediment pli ferm al conturn da las pazientas e dals pazients.
Servetsch d’urgenza da medi(a)s da tgasa
En il rom da la garanzia dal provediment medicinal da basa ha il servetsch d’urgenza ed il servetsch da background spezialisà da medias e medis da chasa ina muntada centrala. A las obligaziuns professiunalas da medias e medis da chasa fa part da garantir il provediment da basa durant l’entir onn da tuttas uras (24/7). Gia ussa garanteschan ellas ed els questa disposiziun, savens senza indemnisaziun directa u ina che cuvra ils custs. Oravant tut en las regiuns cun in bass dumber da medias e medis da chasa u cun pussaivladads da substituziun limitadas, chaschuna quai ina chargia surproporziunala da singuls furniturs da prestaziuns e limitescha l’attractivitad da l’activitad sco media u medi da chasa. En il rom da las discussiuns en connex cun il maletg directiv èn questas sfidas structuralas vegnidas exprimidas da maniera clera. La dumonda d’ina finanziaziun solida e da l’ulteriur svilup organisatoric dal servetsch d’urgenza da medias e medis da chasa vegn suttamessa perquai ad in’examinaziun approfundada, cun la finamira da garantir a lunga vista il provediment e sia qualitad e da rinforzar da maniera persistenta las cundiziuns da rom per medias e medis da chasa.
Autodispensaziun
En il chantun Grischun exista actualmain ina furma maschadada da la consegna da medicaments: En lieus nua ch’ina apoteca publica segirescha il provediment da medicaments per la populaziun da tuttas uras, è l’autodispensaziun da las medias e dals medis limitada a l’emprima consegna, entant che la consegna cumpletta da medicaments tras las praticas da medis è in element fundamental dal provediment medicinal da basa en lieus senza apoteca publica. Spezialmain en regiuns ruralas e topograficamain mo accessiblas cun difficultads, garantescha questa consegna da medicaments directa tras medias e medis ina contribuziun impurtanta a la segirezza da provediment da la populaziun.
En il rom dal svilup dal maletg directiv han ins discutà da maniera approfundada la pussaivladad d’ina reintroducziun da l’autodispensaziun generala. En il decurs da la realisaziun da las mesiras definidas duai perquai vegnir examinà in process da legislaziun correspundent. Independentamain da quai resta la collavuraziun constructiva cun las apotecas publicas expressivamain giavischada e duai vegnir concepida vinavant en furma da partenaris.
Mancanza da persunal qualifitgà a la periferia
La diminuziun da medias e medis spezialisads en regiuns periferas engrevgescha la garanzia d’in provediment d’auta qualitad en vischinanza dal domicil. Pretensiuns da qualitad pli rigurusas sco era dumondas da responsabladad e da finanziaziun betg scleridas chaschunan che tschertas prestaziuns – tranter auter era examinaziuns preventivas spezialisadas che vegnivan fatgas enfin ussa da medias e medis da chasa – na pon per part betg pli vegnir purschidas u messas a quint. Quai periclitescha structuras da provediment existentas ed indeblescha oravant tut en la surfatscha il provediment da basa preventiv e spezialisà.
Per garantir la segirezza da provediment ston ins perquai examinar soluziuns adattadas regulatoricas e da tariffa sin nivel chantunal e naziunal, che segireschan cumpetenzas amplifitgadas da medias e medis da chasa.
Ulteriur svilup da l’assistenza al part
En il sectur da l’assistenza al part dovra il Grischun ina purschida diversifitgada che correspunda als basegns. Necessarias èn soluziuns che tegnan quint als basegns da giuvnas famiglias per in’assistenza damanaivel al domicil e che garanteschan al medem mument la segirezza e la qualitad maximala per pagliolancas ed uffants novnaschids.
Da promover cun ina clera finamira èn oravant tut models da provediment graduads sco:
- chombras per famiglias per rinforzar l’assistenza centrada a la famiglia,
- assistenza al part dirigida da spendreras tar gravidanzas cun pauc risico,
- chasa da parturir con colliaziun reglada ad in ospital cun ina partiziun da parturir cun chirurgia da 24 uras,
- models cooperativs cun concepts da segirezza e da transfer definids.
Il chantun vul sustegnair il svilup da talas purschidas en il rom da la planisaziun dal provediment per garantir la qualitad, la segirezza e l’accessibladad a lunga vista.
Posiziunament da l’ospital da center
Pervi da sias caracteristicas geograficas e sia ferma dinamica turistica è il Grischun dependent d’in spital da center effizient. Quel na surpiglia betg mo la funcziun da provediment centrala per il chantun, el è al medem temp posiziunà sco partenari da prestaziun impurtant per l’entira Svizra sidorientala.
L’ospital chantunal dal Grischun (KSGR) po surpigliar quella rolla, sch’el sa chapescha sco partenari dals ospitals da basa e regiunals en il provediment da basa e concepescha da maniera activa la collavuraziun per lung da las incumbensas da provediment definidas a moda clera. Al medem temp rinforzan cooperaziuns intenziunadas cun l’Ospital chantunal da Glaruna, cun l’Ospital dal Principadi da Liechtenstein sco era cun ospitals en il chantun Son Gagl il posiziunament cuminaivel da la Svizra orientala en il sectur da la medischina spezialisada ed autspezialisada.
Ina muntada speziala en quest connex han quels secturs da prestaziun nua che temp e distanza èn facturs decisivs – p.ex. en la medischina intensiva per uffants u tar il provediment da politraumas tar uffants e creschids. En il sectur da la medischina autspezialisada sto il KSGR garantir oravant tut quellas disciplinas ch’èn stringentamain necessarias per la funcziun da center en in chantun da periferia, sco per ex. la neurochirurgia, la chirurgia vasculara e viscerala, la neurologia, la cardiologia, l’oncologia ed ulteriuras disciplinas che stattan en dependenza.
Ultra da quai duain ins instradar allianzas strategicas cun clinicas universitaras spezialisadas ordaifer il chantun, là nua che maletgs da malsogna cumplex, ma rars, pretendan ina concentraziun dad expertisa e dumber da cas. Partenaris pussaivels èn per exempel l’Ospital d’uffants e l’Ospital universitar da Turitg e l’Ospital d’uffants e l’Ospital chantunal da Son Gagl.
L’ulteriur svilup intenziunà da la furmaziun e perscrutaziun a l’Ospital chantunal dal Grischun è ina pitga strategica centrala per garantir a lunga vista la qualitad medicinala e la cumpetenza da provediment en il chantun. Sco instituziun da perfecziunament renconuschida ed en cooperaziun cun la Facultad da medischina da l’Universitad da Turitg contribuescha l’ospital da maniera essenziala a la furmaziun da medias e medis assistents sco era a la spezialisaziun da medias e medis spezialists.
Ina ferma colliaziun academica promova la recrutaziun da persunas giuvnas qualifitgadas, rinforza l’attractivitad dal lieu e pussibilitescha il transfer d’enconuschientschas scientificas actualas en la pratica clinica. Uschia na vegn betg mo garantida la furmaziun da spezialistas e spezialists e dad ulteriur persunal medicinic qualifitgà, mabain era rinforzada da maniera persistenta la forza d’innovaziun dal sistem da sanadad en il chantun.
Ultra da la funcziun da center medicinal ston ins era sviluppar vinavant il KSGR sco gestiunari da soluziuns cuminaivlas da plattafurmas, sistems d’infurmaziun e projects da digitalisaziun. Cun la finamira da profitar da sinergias en il sistem general, da rinforzar la collavuraziun interinstituziunala e dad augmentar da maniera persistenta la qualitad dal provediment en l’entir chantun.